פרשת האזינו-חמישי
לו חכמו ישכילו זאת יבינו לאחריתם:
איכה ירדף אחד אלף ושנים יניסו רבבה אם לא כי צורם מכרם ויהוה הסגירם:
כי לא כצורנו צורם ואיבינו פלילים:
כי מגפן סדם גפנם ומשדמת עמרה ענבמו ענבי רוש אשכלת מררת למו:
חמת תנינם יינם וראש פתנים אכזר:
הלא הוא כמס עמדי חתום באוצרתי:
לי נקם ושלם לעת תמוט רגלם כי קרוב יום אידם וחש עתדת למו:
כי ידין יהוה עמו ועל עבדיו יתנחם כי יראה כי אזלת יד ואפס עצור ועזוב:
ואמר אי אלהימו צור חסיו בו:
אשר חלב זבחימו יאכלו ישתו יין נסיכם יקומו ויעזרכם יהי עליכם סתרה:
ראו עתה כי אני אני הוא ואין אלהים עמדי אני אמית ואחיה מחצתי ואני ארפא ואין מידי מציל: