פרשת כי תצא-שישי
כי יקח איש אשה חדשה לא יצא בצבא ולא יעבר עליו לכל דבר נקי יהיה לביתו שנה אחת ושמח את אשתו אשר לקח:
לא יחבל רחים ורכב כי נפש הוא חבל:
כי ימצא איש גנב נפש מאחיו מבני ישראל והתעמר בו ומכרו ומת הגנב ההוא ובערת הרע מקרבך:
השמר בנגע הצרעת לשמר מאד ולעשות ככל אשר יורו אתכם הכהנים הלוים כאשר צויתם תשמרו לעשות:
זכור את אשר עשה יהוה אלהיך למרים בדרך בצאתכם ממצרים:
כי תשה ברעך משאת מאומה לא תבא אל ביתו לעבט עבטו:
בחוץ תעמד והאיש אשר אתה נשה בו יוציא אליך את העבוט החוצה:
ואם איש עני הוא לא תשכב בעבטו:
השב תשיב לו את העבוט כבוא השמש ושכב בשלמתו וברכך ולך תהיה צדקה לפני יהוה אלהיך: