פרשת קדושים-שלישי
וכי תבאו אל הארץ ונטעתם כל עץ מאכל וערלתם ערלתו את פריו שלש שנים יהיה לכם ערלים לא יאכל:
ובשנה הרביעת יהיה כל פריו קדש הלולים ליהוה:
ובשנה החמישת תאכלו את פריו להוסיף לכם תבואתו אני יהוה אלהיכם:
לא תאכלו על הדם לא תנחשו ולא תעוננו:
לא תקפו פאת ראשכם ולא תשחית את פאת זקנך:
ושרט לנפש לא תתנו בבשרכם וכתבת קעקע לא תתנו בכם אני יהוה:
אל תחלל את בתך להזנותה ולא תזנה הארץ ומלאה הארץ זמה:
את שבתתי תשמרו ומקדשי תיראו אני יהוה:
אל תפנו אל האבת ואל הידענים אל תבקשו לטמאה בהם אני יהוה אלהיכם:
מפני שיבה תקום והדרת פני זקן ויראת מאלהיך אני יהוה: